Fréttir

Fundur borgarstjóra vegna breytinga á bókhaldi og launaafgreiðslu Formaður Starfsmannafélags Reykjavíkurborgar, Sjöfn Ingólfsdóttir, og formaður BSRB, Ögmundur Jónasson, óskuðu eftir fundi með borgarstjóra til að ræða áhyggjur starfsmanna vegna fyrirhugaðra breytinga á bókhaldsþjónustu og launavinnslu á stofnunum borgarinnar. Fundurinn var haldinn 30. mars í Ráðhúsinu, að viðstöddum ofangreindum ásamt sviðsstjóra Stjórnsýslu- og starfsmannasviðs, Helgu Jónsdóttur, og forstöðumanni kjaraþróunardeildar, Birgi Birni Sigurjónssyni. Á fundinum var ákveðið að borgarstjóri muni ásamt embættismönnum mæta á fund fulltrúaráðs Starfsmannafélags Reykjavíkurborgar 7. apríl næstkomandi og kynna þar þær stjórnkerfisbreytingar sem ákveðnar hafa verið hjá Reykjavíkurborg og þá einkum þær breytingar er varða launavinnslu og bókhaldsþjónustu. Í framhaldinu er áformað að halda fundi með hlutaðeigandi starfsmönnum til að kynna málið betur og fá fram sjónarmið og hugmyndir starfsmanna varðandi útfærslu þessara breytinga.